والله وصرتي تستهينين فيني

وانا الذي سويت لك قدر بيديّ

تدرين وش كنتي قبل تعرفيني ؟

ان قلت لك كنتي ولا حاجة شويّ

أنا الذي فرشت لك رمش عيني

وعملت منك شي وانتي ولا شيّ

جيت أعشقك ما جيت لك تحقريني

جيت اسكنك بسمة ما هو بسكنك غيّ

لا صرت عامل لك قدر قدريني

ترا الكرامة صفحة ما لها طيّ

ما دام ما جيتي غلا لا تجيني

نار الجفا عندي ولا الذل بالفيّ

والله لاهجرك قبل لا تهجريني

اجل تبيعيني وأجيلك برجليّ

يا تتركين الكبر يا تتركيني

لأن المحبة شي والمهزله شيّ

إن كانت الدعوة غلاي وحنيني

يمكن يزول الحقد ويشعشع الضيّ

لكن حكاية ينحني لك جبيني

في ذمتي ما ينحني لك وانا حيّ

جتني ظروف للكدر مستعده
قامت تحدد لي الأحزان ميعاد

مرة مع حظي ومرات ضده
واليا تكدر خاطر القلب تزداد

في دنية خلقت على الناس نده
مردودها للخير تجرح واجهاد

إتجي على المظلوم وتبيح سده
واتجي على الظالم تساهيل وامداد

والصدق فيها ما لقى من يعده
والكذب يلقى له مع الناس شهاد

واللي فقد حق عجز يسترده
يصبح على تسديدة الدين معتاد

ومسكين من راد الزمن يستبده
عيت عليه أقدار الأيام تنقاد

تطرح به الدنيا على القاع مده
مثل الفريسة والمقادير صياد

ضاعت حياته في لحاف ومخده
عدت عليه أيام بغفول ورقاد

وماله عن دروب الوعر من يصده
ولا هو عن دروب السلامات نشاد

تلطمه موجات القدر فوق خده
وتخطي به الخطوة من بلاد لبلاد

حبله قريب وعاجز لا يشده
يحسب جميع الناس قاصين وبعاد

عاند حياته لو حياته تحده
وادى سنينه كلها عناد بعناد

اصحى من الغفلة ترى العمر حده
للوقت سجاته وللموت ميعاد

وهذي هي الدنيا تجي مستجده
تلقى بها المازح وتلقى بها الجاد

قصة حياة ومننا مستمدة
ويلزمها تنفيذ وإخراج وإعداد

عشنا على كف القدر فوق يده
الله خلقنا عباد ونفني له عباد

ولا حاصل للحي ما كان وده
ولا حاصل للي يموتون ميلاد

ويكفيني اني من ظلوه الموده
ومالي مع الخسران بالدين مقعاد

وإن جتني الغفلة علي أوقات شدة
أصبح لها صداد والقلب صداد

وتقدير ربي مالنا في مرده
ومعارض لتقديره إشراك والحاد

سلها سيف القدر والقرم حول عن حصانه

عظم الله أجر كل الأوفياء المخلصين

من رحل نبض القلوب اللي غمر شعبه حنانه

ما بقى للناس نبض ولا قلوب ولا حنين

عيب ما احزن والوطن يدفن جسد من عز شانه

عيب ما احزن والحزن لمفارق الفرسان دين

كيف ما نحزن لسيف(ن) عز دين الله وصانه

كيف ما نحزن لدرع(ن) من دروع المسلمين

كاننا ما نحزن لجابر من بنحزن عشانه

العيون لو ما بكت لمفارقك تبكي لمين

إن رحل حاكم يجي مليون حاكم في مكانه

بس جابر اليا رحل يرجع لنا جابر منين

يا منجي عزة الشعب الكويتي من هوانه

يا مسجي فطرتك في نهج خير المرسلين

كل دمعه كفنتك وما بكت بعدك جبانه

كل عين(ن) ما شكت من غيبتك ما هي بعين

كان لك في كل درب أحباب وأصحاب وميانه

وكل لك في كل بيت أنفاس واحساس وضنين

كنت صبح(ن) ما تعلمنا الفلاح الا عشانه

كنت صرح(ن) ما تزعزعك الرياح وما تلين

بانتصارك زادت أمجاد العرب قدر ومكانه

من ديارك فاض خيرك للمخاليق أجمعين

مع قرارك أدرك التاريخ من يطلق عنانه

عقب نارك ولعت نار القهر بالطيبين

إسألوا دمع اليتامى عن محبته وحنانه

إسألوا التاريخ قبله كان وين وصار وين

إسألوا مجد الوطن عن عهد من وحّد كيانه

إسألوا حزن البشر عن قصة الخير الدفين

إسألوا عن طيبته.. عن هيبته.. عن عنفوانه

إسألوا عن فزعته في نصرة المستضعفين

كيف حاكم يسكن الدنيا ويعمل للديانه

يثبت إنّا خير أمه أخرجت للعالمين

وش تكون الحكمه إن ما جات من منطق لسانه

من هم الزهاد كانه ما هو من الزاهدين

وش يكون الاتزان بجنب عقله واتزانه

ويش هو الدين لو هذا الوَرَع ما هوب دين

لا الوطن كأنه وطن ولا جنانه هي جنانه

كل شي بالبلد يا شيخ مكسور وحزين

شعبك اللي عاش فيك وعشت له بأمنه وأمانه

النهار اللي جمع من وجهك الطاهر جبين

الرحيق اللي زرعته في كفوف الزعفرانه

والغرام اللي تركته في ضمايرنا سجين

والسماحه.. والمروه.. والحميه.. والفطانه

والكرامه والكرم وأهل الوفا والمحسنين

باب قصرك.. مسجدك.. منبره مأذنته.. أذانه

المصلين.. الصلاة.. المؤمنات.. المؤمنين

كلهم من يوم ذاك القرم حول عن حصانه

والدموع تهلهم في كل وقت وكل حين

لي متى.. لين الشعوب تعرف فضله وامتنانه

لي متى.. لين السنين تروح من دون السنين

لي متى.. حتى نحس ان الفرح مثل الخيانه

لي متى.. حتى نزين حزن عمره ما يزين

لين ندفع بالمدامع حزن لا يمكن دفانه

لين نغسل بالجروح آلام كل المسلمين

لين نثبت كيف كان بحبنا سيد زمانه

وكيف لما مات جابر مات مرفوع الجبين

كاننا ما نحزن لجابر من بنحزن عشانه

العيون ان ما بكت لمفارقك تبكي لمين

الزعيم ليا رحل نلقى زعيم(ن) في مكانه

المصيبة ليا رحل جابر.. يجي جابر منين