مشكورين كل اللي ردوا،،، مودا ، شجونه ، مستر كويت ، نور البدر…

الله يعطيكم العافية.

هالقصيدة هي الواقع اللي يصير بحياتنا نتجاهل اخطاء الغير بحجة ان قلبه أبيض ووسيع.

هلا وغلا تيتو،،

مشكور على مرورك الطيب

هلا وغلا أختي الغالية روعة،،

راح أوضح لج انشالله النقاط اللي مومفهومة،،،

– يقابل الناس بوجوه هو صانعها، شكله يحب الناس، شكله يكره الناس، شكله يحس بالناس، شكله…… والله احترنا
معاه،،،

معناها أختي: ان هو يدعي الطيبة والإحساس جدام الناس لكنه يخفي حقده وكرهه لهم فنلاقيه مثلاً يقول لشخص انه يحبه ويعزه لكنه عكس هالكلام، وحتى أفعاله ماتدل على المحبة.

– هوايته التصوير، يصور هالمنظر وذاك، وتحس انه وديع ورقيق، لكن فجأة تلاقي صورك بين الناس منشورة، وعمايلك
مفضوحة، حتى كلامك متصور!!

المعنى: بعض الشباب عندهم هواية التصوير واحنا نعرف انها هواية حلوة، لكنهم يستخدمونها في أمور سلبية وخاصة هالأيام مع تطور الموبايلات المزودة بكاميرات، نشوف بعضهم يفضحون بنات الناس بتصويرهم حتى والبنت تكون غافلة، فينشر الصور بالبلوتوث أو بالإنترنت. ومن كثر ماصارت الناس خايفة من فضايح التصوير صارت حتى تخاف تتكلم لأن ممكن التصوير بكاميرا الفيديو يظهر الكلام اللي ينقال.

– تلاقيه بأشرف المهن الإنسانية، تلاقيه الملجأ لما تتسكر عليك الأبواب، يا أستاذ يا دكتور، وفهموني ياناس فيه أعظم
من هالمهنتين؟!!
هذا مربي أجيال وذاك شافي للناس، لكن تنقلب الدنيا ونشوف هذا مربي للفساد وذاك قاتل للناس!!

المعنى: بعض الناس يشتغلون بمهن إنسانية عظيمة كمهنة الطب والتدريس، لكن هم مو أهل لهالمهن، فنلاقي المدرس اللي يربي جيل كامل هو محتاج بنفسه للتربية لأن أخلاقه تكون منحطة.
وإذا كان دكتور، وطبعاً البعض منهم، نشوفه نفس سالفة المدرس من ناحية الأخلاق، فبدل مايعالج المريضة نشوفه يكون علاقة معاها ويكون مثل المراهق اللي للحين مانضج، فبعد العلاقات مع المرضى يستغل منصبه بالتهديد ( يعني لو ماصار اللي يبيه راح يفضح أمرها) وطبعا الناس ماراح تصدق الا الدكتور بس علشان هو دكتور وبنظر الناس كل دكتور يكون محترم.

– وخلنا الحين من سوالف المنتديات، خلنا نشوف الدنيا من قريب، خلنا نشوف البطش بكل مكان، خلنا نشوف الخيانه
في البلدان، ومن أقرب الناس، خلنا نشوف المذابح من أهلنا، خلنا نشوف الحقد من أصلنا،،،
ومن ضعفنا نحط اللوم على الأمريكان!!!

المعنى: الظلم منتشر بكل مكان في العالم وخاصة الوطن العربي، والمسلمين يعانون الظلم من حكوماتهم قبل حكومات غيرهم، ونلاقي كثير من المسلمين الخونة اللي يعملون لحساب الأعداء، فنلاقي المجازر اللي تصير ببلاد المسلمين تكون أساسها من خيانة بعض المسلمين لأخوانهم.
ولأنهم ضعاف كل ماصار شي من تفجير أو قتل أو أي مصيبة قالوا الأمريكان عملوها، هو صح الأمريكان عملوها، لكن بالإتفاق مع من؟! مع ناس البلد نفسهم.

* أتمنى أختي أكون وضحت لج كل النقاط اللي مو مفهومة