@aailantlqay
ردود العضو
-
المشاركات
-
أشكرك يازاهر على ردك، بخصوص الغزل الخفيف اقتنعت بالمعنى، أما بخصوص إني شهدت عليك في وضع غير أخلاقي، فيعتمد إيش قصدك بالوضع غير الأخلاقي، وبخصوص الإثباتات فأعتقد الرسالة الخاصة اللي أرسلتها لك فيها الكفاية إلا إذا تريد أكثر، وأنا ماأعرفك شخصيا يازاهر وكلامي ماهو مزاح.
*خذ الحكمة من أفواه العقلاء*
أولا ياأم لينا تأكدي إني مامعصب عمري مثل ماتقولي، على الأقل ماوصلت للحالة اللي تخليني أطرد الناس من مكان أصلا ماهو ملكي. ثانيا ليش تفترضي إن كلامك مامرحب به؟؟ عني أنا شخصيا أصلا مااهتميت بكلامك اللي قلتيه، وإلا كنت على الأقل رديت على عبارتك اللي تقول (واللي ماعاجبنه يدق راسه بشاشة الكمبيوتر). بخصوص الموضوع فماهو بيني وبين زاهر، بس أسلوبه مايعجبني، فطبعا رديت عليه باللي كان في بالي، وصراحة ماكنت أريد أرد بس حسيت إني لازم أرد، يعني ماحلوة أكتب موضوع له، وبعدين ماأرد عليه. ورغم إني مابغيت أرد، إلا إني رديت، بس من شان أوضح وجهة نظري، طبعا ماحد ملزم بإنه يوافقني الرأي، بس المفروض اللي يرد علي، يرد في حدود الأدب والمعقول.
بخصوص آيات القرآن الكريم، القرآن الكريم أمرنا بالتدبر والتعلم في كل مجالات الحياة (إقرئي في القرآن وتعلمي)، إذا الكمبيوتر هو علم أيضا، وبالتالي فنحنا مأمورين إنا نتعلمه، ولكن هذا التعلم مايكون في الغزل ياآنسة، يكون في اللي فيه الفائدة، وبعدين ليش تنصحيني بتدبر آيات القرآن وتنسي نفسك؟؟ ولا إنتي وصلتي لمرحلة خلاص مامحتاجة تتعلمي أكثر؟؟ ولا يمكن أنا بتفيدني وإنتي مابتفيدك؟؟ ياذكية، أنا الكلام اللي قلته هنا كان من باب الأمر بالمعروف والنهي عن المنكر، فإذا ماأحاول أضيع وقتي في كلام اللغو. بخصوص التعرض للزنى، ماهي مجالسنا اللي تؤدي لهذا، ولكن هو كلام الغزل العفيف اللي تكلم عنه الأخ زاهر، الغزل ياأخت أم لينا، زين؟ فهمتي ولا بعدك؟؟؟ ولاتنسي إنه في مجالسنا شيء مجالس لها أهداف تعليمية وفيها مواضيع جيدة.
لما قلت إني فكرت إني أترك مجالسنا، ذكرت السبب وهو المواضيع التافهة، وبالتالي ماهي مجالسنا اللي ماتعجبني، لا المواضيع التافهة هنا هي السبب، وبالطبع المواضيع التافهة سببها الناس الغير جادين. وماإنتي اللي تقولي لي إني أترك مجالسنا، خلي هذا الكلام لغيرك، زين يالطيبة؟؟ أول سوي لك موقع خاص بك، ولما أجي فيه طرديني، زين؟؟؟؟؟
هذا اللي عندي، وعسى تفهميه بالطريقة الصحيحة.
ملاحظة أخيرة:
خذ الحكمة من أفواه العقلاء، العقلاء فهمتي؟*خذ الحكمة من أفواه العقلاء*
أولا أحب أوضح إني لما رديت على الموضوع أمس كتبت رد بسيط، لأنه ماكان عندي وقتي أما الحين فعندي الوقت الكافي، لكن للأسف ماأعتقد شيء فائدة من الرد، لأنه بيكون مثل النفخ في قربة مقطوعة (مثل مايقول المثل المصري)، لأنه القليلين اللي بتقبلوا هذا الكلام، المشكلة إن كل واحد عنده فكرة ومامستعد يتقبل فكرة ثانية، وهذا واضح من بعض الردود.
عدة مرات فكرت إني أترك مجالسنا، وهذا بسبب إن معظم المواضيع مالها قيمة كبيرة، طبعا شيء هناك مواضيع مفيدة كثيرة، بس أغلبية المواضيع مامنها فائدة، وحتى إذا بدأت بداية ممتازة، تبدأ الردود (السخيفة) بالظهور وتفسد هذي المواضيع، أخي زاهر، إنته تقول (ولكن الغالبية وللأسف يتسلون….) يعني إنته تقول للأسف، وإنته واحد من جملة الغالبية هذي، يعني إنته واحد من اللي للأسف يتسلون. باب حرية الرأي والتعبير – اللي تتكلم عنه – مايعني إن الباب مفتوح لكل المشاركات الهادفة وغير الهادفة في كل وقت وكل مكان (وأقصد في أي موضوع وأي مجلس….)، المشكلة إن البعض يحاولوا يستغلوا كل فرصة لإظهار نفسهم، وقصدي هنا معروف، فهم لايظهروا نفسهم بالمواضيع الجادة، بل بالتباهي والتفاخر العديم القيمة، والبعض يكتفي بكلمة أو كلمتين كردّ، وهناك أيضا الأشخاص الذين يضعون صورة كردّ على موضوع!! هل هذا هو باب حرية الرأي والتعبير؟ اسمح لي بس هذا أسلوب عقيم، مامشكلة إن الواحد يعمل هذا الشيء مرة مرتين، بس لما تكون معظم مواضيع الشخص على هذا المنوال، فما أقول إلا لاحول ولاقوة إلا بالله… (اما اتهامك لي بانني أجيد الغزل ..فهي معلومة جديدة لم احسب لها حسابا وما دمت كذلك في نظرك…)، زاهر هذا بيكون بيني وبينك يازاهر. (لكنني أحب الغزل العفيف)، أي غزل عفيف؟؟ إيش مفهوم الغزل العفيف؟؟ ياأخي هذا من مقربات الزنى، والله سبحانه وتعالى قال (ولاتقربوا الزنى..)، قال لاتقربوا، ماقالوا لاتزنوا، الرجل والمرأة كلهم عواطف، وهذا شيء الله خلقه في البشر، فلاتقول لي إنك ماعندك رغبات وشهوات، ولاتقول حاجة بسيطة أو مجرد كلام، وخاصة بعد كلام الرسول محمد صلى الله عليه وسلم بمامعناه (وهل يكب الناس في النار على وجوههم إلا من حصائد ألسنتهم). وانتبه، ترانا كلنا في نفس المركب، وكل واحد منا يفهم الثاني، ولاإنت مختلف عن غيرك؟؟ بعدين، اللي أعرفه عنك (وهذا أيضا بيني وبينك) إنت مامال غزل عفيف، إن شاء الله برسل لك رسالة خاصة وبخبرك.
أمس أوردت في موضوعي آية قرآنية واحدة، وهذي آيات قرآنية، يعني ماكلامي أنا، بل كلام الله في حكم اللغو (وأظنك مابتعارضني في إن كلام الغزل يندرج تحت اللغو):
1) (قد أفلح المؤمنون. الذين هم في صلاتهم خاشعون. والذين هم عن اللغو معرضون) = يعني المؤمنون – الله يجعلنا منهم- من صفاتهم إنهم معرضون اللغو.
2) (والذين لايشهدون الزور وإذا مروا باللغو مروا كراما) = وهذي من صفات عباد الرحمن، يعني أيضا معرضون عن اللغو ولايشاركوا فيه.
3) (وإذا سمعوا اللغو أعرضوا عنه وقالوا لنا أعمالنا ولكم أعمالكم سلام عليكم لانبغي الجاهلين) = يعني إن العمل باللغو من صفات الجاهلين – الله يجيرنا عنهم.
زاهر، (وماأبرئ نفسي إن النفس لأمارة بالسوء إلا مارحم ربي إن ربي غفور رحيم)، أنا في الوقت اللي أكتب لك هذي الرسالة، أذكر نفسي بكل اللي فيها، لأني مامعصوم عن الخطأ، بس الأفضل إن الواحد يرجع عن أخطاؤه، كل واحد ممكن يمزح ويروح عن قلبه، بس بحدود وبشرط إنه مايكون الغزل هو همه الأول والأخير، وأعرف إنه لكل واحد نقاط ضعف، بس الواحد عليه يدعي ربه إن يقويه بالإيمان، مايكابر ويعاند.
هذا اللي عندي، والمجال مفتوح لكل من يريد بالمشاركة، والعذر على طول الموضوع والعذر أيضا إذا كنت أسأت لأي شخص.
*خذ الحكمة من أفواه العقلاء*
صدق الله العظيم القائل (وإذا مروا باللغو مروا كراما)
إن شاء الله برجع لك مرة ثانية يازاهر، لأن الوقت مايسمح الحين، حياك الله
*خذ الحكمة من أفواه العقلاء*
وينك يازاهر؟ وين ردك؟ إنته اللي بديت في هذا الموضوع، فياريت لو تعطينا رأيك في موضوع المغازل وخاصة إنه من الواضح إنك أحد الخبراء في هذا المجال
*خذ الحكمة من أفواه العقلاء*
إنت الأطيب والأحلى يالساحر .. وأنا أموت فيك
مع تحيات
الــــــــمـــــــــــيــــــــــــــــنــــــــــــــــــــــــــون
*خذ الحكمة من أفواه العقلاء*
ويييييييييييييييييييييو الملك عصّب …. أحسن لي أشرد *لإلاّ يأمر حرسه بإلقائي في زنزانة مظلمة مع الجرذان والصراصير*
يالله عاد لاتبوّز …. هذي حالك مني
*خذ الحكمة من أفواه العقلاء*
توا انته ياخالد صدقت إنه جاد في موضوعه؟ انت حتى شوف طريقته في طرح الموضوع، يريد الرد بسرعة!!!!! هذا الموضوع ما مال سرعة يالعبقري، وإذا تريد رد معقول ونقاش معقول رد على النقاط الذي ذكرها خالد
*خذ الحكمة من أفواه العقّال*
أخي العزيز حارس الأشواق.. السلام عليكم ورحمة الله وبركاته …. أولا الكلام هنا لم يرد بصفة شخصية، يعني ليس موجها للأخ البريد خصوصا ولا لأي شخص ثاني، وأيضا البيت في حد ذاته، ليس هو المقصد أساسا، يعني بالإمكان بدلا من ذكر كلمة (البيت) ذكر أي مكان يخص صاحب المحل (أو الشخص المخاطَب).. وبالتالي، فليس هناك أي غرض من وراء ذكر كلمة البيت للأخ البريد غير الغرض الواضح، والرجاء أن تفهم الكلام كما هو مقصود… والمقصود بالضبط هو بما أن المحل يخص صاحبه وهو مخصص كمطعم كما فهمت من كلام الأخ البريد، يعني لامرقص ولابار ولا مخصص لمثل هذه الأمور بأي حال من الأحوال…، فكيف يرضى بأن تحدث فيه مثل هذه الأمور؟ كيف يسمح له دينه؟ كيف تسمح له أخلاقه؟ هذي هي النقطة الأولى..
الشيء الثاني، اللي يدير المطعم، شيء مؤكد إن وراء الإدارة شخص عماني، وحتى لو كان المدير وافد، فلازم يكون له كفيل عماني، وبالتالي المرجع هو عماني، الحين هذا العماني، هل يكفي إنا نقول بإنه شخص بدون مشاعر أو أخلاق أو قيم إسلامية؟!؟!! هل هذا يكفي ياحارس الأشواق؟ على الأقل ياأخي اهجر هذا المطعم، وتأكد إنه لو انقطعوا عنه الناس بهذا السبب، أكيد صاحب المحل بيتخلص من هذين البنتين، وبيخبرهم إنه مايريدهم في مطعمه مرة ثانية؟ بس يظهر إنه هذا الشيء ماأثر على تجارته، أو يمكن أثر بطريقة إيجابية، وهذا خطؤه وخطأ الآخرين (اللي رضوا يروحوا لمثل هذا المطعم).. هذا عن العماني، أما الوافد، فهل يكفي إنا نقول إنه يريد يربح وبس؟ لا طبعا، أقل حاجة غير إنك تهجر المحل إنك تروح وتخبر الشرطة، بحكم إنهم هم السلطة اللي لها الحق في التصرف معه.. وأكيد شيء طرق كثيرة لمحاربة مثل هذي الأشياء، بس الواحد مايستسلم ولايتجاهل هذا الشيء..
أخي البريد، أنا معك في حذف إسم المحل، فهذا المكان ليس للتشهير، بل لمناقشة الأمور المهمة، على الأقل بيننا، وتأكدوا جميعا بإنه كل شخص يأتي لمجالسنا ويشوف المواضيع اللي تناقش مواضيع جادة، وكل واحد يناقش بعقلانية وجدية، أكيد هذا الشخص بينتمي بدوره إلى مجالسنا وبالتالي نستفيد من أفكاره وآرائه.. وهذا اللي كلنا نريده.. وبعدين حتى لو كان هذا الشيء صار في نزوى، الكل يعرف إن مثل هذي الأشياء موجودة ومنتشرة بس في الخفاء.. والله يعينا بس ويحفظنا.. ومشكور جزيل الشكر أخي البريد على تجوابك معنا نحن المشتركين 🙂
والشكر الجزيل أيضا لكل شخص مهتم بمناقشة الأمور المهمة.. وآسف جدا جدا على الإطالة..
تم تعديلة بواسطة جاسم أل محمد في 22-01-2001 17:08 م
بسم الله والصلاة والسلام على رسول الله..
الإخوة المشرفين والمشتركين.. هذا موضوع جاد.. وحتى لو كانت هذي الحادثة قليلة الحدوث إلا إن الفكرة الأساسية منتشرة.. والمفروض مناقشة الموضوع بشكل جدّي وليس التقليل من قيمته..
أخي البريد.. كلامك مامنطقي أبدا أبدا.. الحين وين الغيرة وين التمسك بالإسلام.. وين الأمر بالمعروف والنهي عن المنكر.. وليش تقول المحل ماذنبه.. هل ترضى إنه واحد يعمل هذا الشيء في بيتك؟ طبعا بترد عليّ وبعصبية لا، إذا ليش هذا الأخ -صاحب المحل- رضى إنه كل هذا يصير في محله أو حتى أمام محله؟؟؟ وبعدين أي وجه مشرق لمثل هذا الشيء؟؟ وين؟؟ وأي حياة اللي تبتسم؟؟ ماأريد أكبرها، بس أريد إنك تكبر تفكيرك شوي.. ولاأريدك تعتقد إني مرشد ديني أو شيء.. بس أريد أذكرك بشيء بسيط (وماخلقت الجن والإنس إلا ليعبدون).. يعني لازم يكون كل همنا عبادة الله سبحانه وتعالى.. وليس النظر إلى الوجه المشرق للحياة.. الدنيا فانية والآخرة باقية.. وإيش أكثر من إنه الواحد يشوف الفسق والفاحشة ويسكت عليها؟؟ ياأخي أقل الشيء (.. فبقلبه وذلك أضعف الإيمان..).. على الأقل استنكره بقلبك ماتتناساه وتتجاهله.. اعذرني أخي العزيز وليعذرني الجميع.. بس شفت ردّك غير مناسب.. الموضوع أكبر من كونه مجرد محل في نزوى أو غيرها.. المحل مشكلة مجتمع.. وهذا في بدايته.. الواحد لازم ينتبه لهذا الشيء من أوله ويحاول يحاربه بكل وسيلة (على الأقل استنكار في القلب.. هذا أقل القليل).. مايتجاهله ياأخي العزيز.. والله يوفقنا جميعا لما فيه الخير والصلاح..
ملاحظة بسيطة للموزيات.. المشكلة إنه الواحد بدون مايراقب يشوف هذي الأشياء.. كل يوم في كل مكان.. وحتى لو لم تصل لهذي الدرجة فهي على الأقل صورة مصغرة منها.. والله يعينا في دنيانا وآخرتنا..
اللي أعرفه إنه لاإله إلا الله ياللي مسمي نفسك إله الحب. أما المثل فمكانه هنا بس يمكن إنت عقلك متطور أكثر من اللازم ومافهمته يالعبقري
وعلى فكرة أنا أقدر اقرأ الخط الصغير فما فيه داعي تكتب بخط كبير يالأحول
