يالله تغفر لي ولا تبلانـــــــــي……………….. واجعلني أبيض قلب صافي نيــــــــه

وتعيني في الماقف الانسانـــــي……………….. وتصلح لنا في المال والذريــــــــــــه

أنت اكفني عن عثرة الصدقانـــي……………….. وكلمة قريب(ن) توجع النفسيــــــــــه

وازهل علي مواجهه عدوانـــــي……………….. روس العدى كرامة الجنبيــــــــــــــــه

دايم لساني في اللزوم حصانــي……………….. خيره وشره كل أبوها ليــــــــــــــــــــه

اسخره في خدمة الأوطانـــي……………….. وفي مجال الدعوه الدينيــــــــــــــــــه

ومن دون حكام البلد له شانــي……………….. ومن دون ربعي وقفته مثنيــــــــــــــه

مرات ياخذني على خلانــــي……………….. الحب وزن الشعر والقافييــــــــــــــــه

عندي يساوي قلة اليابانـــــي……………….. وما عده العساف في الماليــــــــــــــه

ياكم وياكم شايبي وصانـــــي……………….. كم مرت(ن) يظهرلي المخفيـــــــــــــه

قال العرب كلامها مجانـــــي……………….. وأفعالها بالفلس والربيــــــــــــــــــــه

أشهد أنه شايب(ن) ربانــــي……………….. ياجعلني فدوة تراب احذيـــــــــــــــــه

سلام ياتاج(ن) على التيجانـــي……………….. على جباه(ن) طيبه واتقيـــــــــــــــــه

عمي وعم(ن) من على عمانـــي……………….. وأبوي لو الأسما مهي مسميــــــــــه

معزبي ومعزب الشيخانــــــي……………….. واسمع سوالف روحي المشقيــــــــه

كبرت جاهي واكثرو ضيفانــي……………….. وقالوا علي الربع والعانييـــــــــــــه

وخسارتي تدبلت واقذانــــي……………….. وفقري يقل الحيل في يديـــــــــــــــه

قالوا عطاه الدر والمرجانـــــــي……………….. وقالوا هباله قصر في الشرقيـــــــه

وقالوا رصيدي يبري الوجعانـي……………….. وأنا على سيارت(ن) كوريــــــــــــه

هي والشبح وكيلها الوعلانــــي……………….. سبحان من فرق أخ(ن) عن خييـــه

قل للمحيسن ينجز القحطانـــــي……………….. يصرف مايبني له العشره الزوجيـه

يعطيني الياقلت واما أعطانـــي……………….. أظهرت دمعة عيني المخفيــــــــــــه

لي جيت أبعايد على شيبانـــــي……………….. حنيت نفسي من خلا كفيــــــــــــــــه

فقير ويعايد على فقرانــــــــــي……………….. أمحق فقر وامحق بعد عيديـــــــــــه

ياسعود ماشين موتة الوحداني……………….. وان مات لا هذي ولا هذيـــــــــــــــه

من حر قيض الأرض في الصماني……………….. يمشي الجمل بالطاقه الشمسيــــــــه